«Кеңешип кескен бармак оорубайт»

24.01.2012

К.Баялинов атындагы китепканада вице-премьер-министр Жоомарт Оторбаев Өкмөттүн реформалык программасын жарандык коом жана бизнес чөйрө¬сүндөгүлөргө тааныштырып, ал кызуу талкууга алынды.
Баяндамачы программадагы негизги багыттарга басым жасады. Бюджетти борбордоштуруу алыстатылып, жергиликтүү бюджет көбөйтүлөрү айтылды. Негизги багыт катары: мамлекетти башкаруу реформасы, бюджеттик реформа, укук коргоо системасындагы реформа, экономиканы жана аймактарды өнүктүрүү, социалдык чөйрө баса көрсөтүлдү. Бюджет жыл сайын динамикалуу 15%дан өсөөрү, он жылда 50%га өскөнү, 2014-жылы эки эсе жогорулашы маалымдалды. Ал үчүн коррупцияны 30%га кыскартуу пландалган.
“Сиздер, жарандык коомчулук, ишкерлер, сунушталган кандай программалар, долбоорлор болсун, аны талкуулоого катышпасаңыздар, сапатына таарынбаңыздар”, – деди Ж.Оторбаев.
Талкууга жарандык коомго караганда ишкерлер басымдуу келишиптир. Кыргызстандагы базар, соода ишканаларынын жана тейлөө чөйрөсүнүн президенти Сергей Пономарев айыл чарбасын, соода жүгүртүүнү каржылоо, тышкы өзгөрүүлөр, мисалы, бажы союзуна кирүүдөгү багыттар ачык айтылбагандыгын сындады.
Каржы министринин байкоочу кеңешинин төрагасы Азамат Акелиев жумушсуздукту жоюу Өкмөттүн программасында жеткиликтүү чечилбегендигин белгиледи. Чыгып сүйлөгөндөр Өкмөттүн эл менен акылдашууга чыкканын, ачыктыкка барып жатышканын колдошуп, сынын да айтып жатышты. Өзгөчө алар реформанын тууралыгын колдошоорун, бирок, ага каражат кайдан алынат деген күмөн ойлорун айтышты. Айрыкча жумушсуздук, коррупция, салык, жеке менчикти коргоо, инвестиция тартуу маселелери кызуу талкууга алынды.
Алардын сунуштарына жана суроолоруна жооп берген вице-премьер-министр Жоомарт Оторбаев: “Кеңешип кескен бармак оорубайт” дегендей, реформалык программаны бирге ишке ашырабыз. Элдин күчү биримдикте”, – деп жыйынтыктады.
Марип ТАЙЧАБАРОВ, “Кыргыз Туусу”