Үрөндү биргелешип даярдайбыз

21.02.2012

– Үрөнчүлүк боюнча 68 мамлекет менен байланыш­табыз. Жылына 118 млн. дол­лардык үрөндү экспорт­тойбуз. 2023-жылга Түркиянын 100 жылдыгына карата   500 миллионго жеткиребиз. Сиздер эс-  кирген үрөндөрдү пайдаланып жатыпсыздар. Бирге иштешсек, экологиялык таза түшүмдүү үрөндү даярдоого, пайдаланганга жетишебиз, – деди өткөн жумада Түркиянын
ТСУАБ – үрөн өндүрүүчүлөрдүн жа­на өстү­рүүчүлөрдүн бирикмесинин төрагасы Илхами Өзжан Айгюн КРнын үрөнчүлүк ассоциациясынын президенти Таалайбек Айдаралиев жана Кыргызстан-Түрк “Манас” университетинин агрардык факультетинин деканы Аскарбек Түлөбаев менен айыл чарба өсүмдүктөрү жана мал чарбасы үчүн үрөнчүлүк тармагын алдыңкы технологияда даярдоо боюнча кызматташуу тууралуу меморандумга кол коюу учурунда.

Эми Кыргызстандын айыл чарба адис­тери үрөн даярдоо боюнча дүйнөдөгү алдыңкы он орунга кирген Түркиянын үрөн даярдоочулары менен бирдиктүү иш алып барышып, Кыргызстанга ыңгайлуу мол түшүм бере турган, экологиялык жактан таза үрөндү даярдоого жетишмекчи.

– Биз үч күндүк жолугушууда жаңы тех­но­логияда жаңы сортторду даяр­доо, өсүмдүктөрдү коргоо боюнча сүй­лөшүүлөрдү жүргүздүк. Бүгүнкү жолугушуу – биринчи кадам, – деди Таалайбек Айдаралиев.

– Биз агрардык факультеттин студенттерине жаңы технологияда жаңы үрөндөрдү даярдоо боюнча окутууга милдеттенип жа­табыз. Бизге теориялык жана практикалык билим, тажрыйба алууга негиз болот. Бул бири-бирибизге болгон ишеничибиз, биринчи кадамыбыз түз, бекем болсун, – дейт Аскарбек Түлөбаев.

Марип ТАЙЧАБАРОВ, “Кыргыз Туусу”