Жер-Эненин топурагы жакшы үрөндү күтөт

17.02.2012

Бишкекте Түрк айыл чарба адистеринин иш тажрыйбаларын талдаган эл аралык кеңешме өтүп жатат.

“Жакшы топуракка өнүм­­­дүү үрөн таштай албаган дыйкандын колу уялсын”. Түрк элинин бел­ги­лүү акыны жазган бул саптарды Түркиянын үрөн өн­дү­рүү­чүлөр бирикмеси өздөрүнүн девизи катары алып жүрү­шөт. Акыркы он жыл аралыгында боордош мамлекеттин үрөн­чүлөрү өз өлкөсүндө эле эмес, эл аралык алкакта да чоң жеңиштерге жетишип жаткандыгына алардын коң­шу мамлекеттердин үрөн рыногуна болгон оң таасири далилдеп турат.

Түрк өнөр жайчыларынын жана үрөн өндүрүүчүлөрүнүн бирикмесинин делегация мүчөлөрү атайын ишкер кеңешме менен борборубуз Бишкекке келишкен. Буга чейин алар Азербайжан, Украина, Орусия жана Босния Герцеговина мамлекеттеринде болуп  кайтышкан.

Бишкек кеңешмесинин алкагында Кыргызстандын үрөн өндүрүүчүлөрү менен TSUAB бирикмесинин мүчөлөрү ортосунда айыл чарба багытында сүй­лөшүүлөр жүрүп жатат. Негизги максаты – үрөнчүлүк  өндүрүшүндө кызматташууга жетишүү жана тажрыйба алмашуу. Биздин беде, эспарцет өңдүү үрөндөрүбүз аларды көптөн бери кызыктырып да жүргөн экен. Өз кезегинде түрк үрөнчүлөрүнүн жашылча жана жемиш багытындагы жетишкендиктери эл аралык деңгээлде да бааланууда.

Кеңешмеге коң­шу­лаш­ Казакстандан, Азер­бай­жан­­дан жана Орусиядан адистер катышып жатат. Көп жактардан келишкен адистердин биздин айыл чарба багытына болгон көз караштары бирдей—жакшы экендиги мени кубандырды. Алар биздин жерибизди—топурагыбызды абдан жогору баалашты, өтө ысык  эмес климатыбызды­ жана өзгөчө агын сууларыбыздын таза жана мол экендигине суктангандыктарын да жашырышкан жок. Демек, мындай бейиштин төрүндөй болгон жерибизде таза жана сапаттуу азыктарды өндүрүүнүн өзү эле ырахат болууга тийиш.

Кеңешме дагы эки күн аралыгында өз ишин улантмакчы. Кеңешменин кечээ күнкү ишинде биздин айыл чарба министрине, Кыргызстандын үрөн өн­дүрүүчүлөр ассоциациясынын жетекчисине, финансы полициясынын башчысына, Айыл чарба университетинин агрономия факультетинин деканына жана башка бир катар айыл чарба багытындагы адистерге эстелик бе­лектер тапшырылды. Бул белектер берекелүү Кыргыз жеринин айыл чарба адистерин кубантып эле тим болбой, аларды намысына келтирип,  билек  түрүнө иштөөсүнө түрткү берет де­­­­­­ген ишеним менен кеңешмеден чыктым.

Гүлсүн КАРАБЕКОВА, “Кыргыз Туусу”